Սուրեն՝ մեր սրտերը գրաված տղան

Խոստացանք Ձեզ հետ կիսվել երեխաների հետ մեր հանդիպումների պատմություններով: Մեր հերոսներից մեկը դարձավ Սուրենը, մի տղա, որը գրավեց մեր սրտերը։

Նրան հանդիպեցինք Հայաստանի սահմանամերձ գյուղերից մեկում՝ Կոթիում, մեր «Դարձիր Ձմեռ պապ» նախագծի ժամանակ։ Ինչպես բոլորը, նա էլ նամակ գրեց Ձմեռ պապիկին և ցանկացավ… ոչ թե գրենական պիտույքներ, ոչ թե խաղալիք մեքենա, այլ դհոլ (հայկական ավանդական երաժշտական գործիք):

Յուրաքանչյուր նվեր անցնում է մեր միջով, բայց երբ երեխաները արվեստի հետ կապված ինչ-որ բան են խնդրում, այն հատկապես հիշարժան է մնում: Սրա մեջ հատուկ, սուրբ իմաստ կա:

Սուրենը մեզ համար ուրախությամբ դհոլ նվագեց՝ ևս մեկ անգամ ապացուցելով, որ երեխայի ստեղծագործական գործունեությունը սահմաններ չունի։ Եվ եթե ինչ-որ սահմաններ հայտնվեն, մենք կջնջենք դրանք։

Բացի իր գեղարվեստական զբաղմունքներից, Սուրենն արդեն ապագայի պլաններ ու ձգտումներ ունի՝ նա մտադիր է բժիշկ դառնալ` գերազանց է կենսաբանության և քիմիայի ոլորտներում:

Իր տարիքի համար տղան հստակ հասկանում է հայրենիքի արժեքը և սերը նրա հանդեպ։ Նա հարգում է երկրի պատմությունն ու նրա ազգային հերոսներին։ Նրա պատմություններից այն կողմ մենք դա զգացինք, երբ կանգնեցինք փողոցում։ Երբ մեր զինվորներին տեղափոխող զինվորական մեքենաները սկսեցին անցնել, այդ պահին Սուրենը առանձնահատուկ հպարտությամբ ոտքի կանգնեց՝ ողջունելով և անվտանգ ճանապարհ մաղթելով։

Բայց մեր ծանոթությունն այսքանով չավարտվեց. Սուրենը դրսևորեց իր զգացմունքները՝ համարձակ ու բաց, կիսվելով, որ առանձնահատուկ զգացմունքներ է ապրում մի աղջնակի  համար։ Մեր կամավորները չէին կարող անտարբեր մնալ, և արդեն հաջորդ օրը նրանց շնորհիվ Սուրենը ծաղկեփունջ նվիրեց իր ընտրյալին և լուսանկարով կիսվեց մեզ հետ։

Այս տղան աչքի է ընկնում իր քաջությամբ, իմաստությամբ, ուշադրությամբ և բարի սրտով: Նա մեզ շատ բան է սովորեցրել, և իր հերթին մենք կշարունակենք կապ պահպանել նրա հետ և հետևել նրա անհավանական պատմությանը։