Լիլիթը՝ մեր նոր շահառուն
ԴՐԱՄԱՀԱՎԱՔԸ ՓԱԿ Է, ՇՆՈՐՀԱԿԱԼՈՒԹՅՈՒՆ ԲՈԼՈՐԻՆ
Սա Լիլիթն է՝ մեր նոր շահառուն։ Նա 12 տարեկան է, ապրում է Երևանում։
Երբ Լիլիթը շատ փոքր էր, նրա ծնողները ականջի հատվածում փոքրիկ գոյացություն նկատեցին։ Ժամանակի ընթացքում այն սկսեց ավելի ու ավելի մեծանալ: Բժիշկների հետ խորհրդակցելուց հետո Լիլիթը վաղ տարիքում վիրահատության է ենթարկվել՝ հեռացնելով գոյացությունը, որպեսզի այն չսեղմի քնային զարկերակը։ Ավաղ, վիրահատությունն անհաջող է անցել՝ դրա իրականացման ընթացքում վնասվել է դեմքի նյարդը և այդ օրվանից Լիլիթի դեմքը աղավաղվել է։ Ծնողները, վիրահատությունից հետո տեսնելով աղջկա դեմքը, սկսեցին փնտրել այս խնդիրը վերացնելու բոլոր հնարավոր ուղիները։
Բացի էսթետիկ թերություններից, դեմքի կաթվածահար մկանների պատճառով երեխայի աչքն ամբողջությամբ չի փակվում նույնիսկ քնած ժամանակ։ Սա հանգեցնում է ախտահարված կողմի աչքի անընդհատ արցունքահոսությանը: Հայաստանում բժիշկները չէին համարձակվում ձեռնարկել այս բարդ վիրահատությունը։ Ռուսաստանից հարազատները դիմել են Բուրդենկոյի անվան գիտահետազոտական ինստիտուտ, այնտեղից ուղարկվել են Յարոսլավլ՝ բժիշկ Մ.Լ.Նովիկովի մոտ, ով մասնագիտացված է նման իրավիճակներում։
Բժիշկը համաձայնել է բուժել երեխային։ Բուժումը ընթանալու է երեք փուլով՝
1. Վնասված նյարդերի վերականգնում (վիրահատությունը կատարվել և վճարվել է հարազատների կողմից)։
2. Մկանների փոխպատվաստում դեմքի վնասված հատվածում (նաև իրականացվում է Ռուսական հիմնադրամի հաշվին)։
3. Եվ վերջապես, դեմքի մկանների աշխատանքի վերականգնումը երրորդ վիրահատությունն է, որը պետք է կատարվի։
Ցավոք, ընտանիքը, որը բացի Լիլիթից ևս երկու երեխա ունի, վերջին փուլի համար միջոցներ չունի։
Լիլիթը գերազանցությամբ սովորող աշակերտ է, բայց մեկ անգամ չէ, որ ստիպված է եղել փոխել դպրոցը, որպեսզի խուսափի իր արտաքինի վերաբերյալ ծաղրից և հասակակիցների կողմից իրականացվող բուլինգից
Ձեզ հետ միասին մենք ցանկանում ենք օգնել այս գեղեցկուհուն և բացում ենք դրամահավաք՝ 215,750.00 ռուբլի: Նաև անհրաժեշտ են Լիլիթի և իր մայրիկի թռիչքի տոմսերը Ռուսաստան (~ 30,000 ռուբլի)։
Մենք նպատակ ենք սահմանել փակել դրամահավաքը 5 օրում։ Հետևաբար, մենք ողջունում ենք առավելագույն տարածումը և ցանկացած տեղեկատվական աջակցություն: