Երեխայի զարգացման կարևոր ասպեկտներից մեկը կրթությունն է, որն օգնում է ընդլայնել նրանց աշխարհայացքը և բացահայտել ինչ-որ նոր բան ոչ միայն իրենց շուրջը, այլ նաև  իրենց ներսում: Ուրախ ենք տեղեկացնել, որ   10-ից 15 տարեկան արցախցի երեխաների բիզնես- դասերի կազմակերպմանն ուղղված՝  մեկնարկում է դրամահավաք: 

Ցանկանում ենք ձեզ ներկայացնել ստեփանակերտցի մեր շահառուներին.
Արինա Ավագիմյանը տաղանդավոր աղջիկ է, ով հաճախում է պարի դասերի արդեն 5 տարի, իր բացառիկ սերը հայկական ազգային պարերն են: Ստեփանակերտում Արինան հաճախել է նաև նկարչության և տիկնիկային թատրոնի խմբակների։
Դավիթ Գրիգորյանը ընկերասեր և ակտիվ տղա է։ Դավիթը միշտ հետաքրքրվում է ինչ-որ նոր բանով, զարգացման հետաքրքիր ուղղություններ է փնտրում։ Նա հաճախում է տարբեր խմբակներ՝ մենթալ մաթեմատիկայի, պարի, փայտամշակման, շախմատի և ձյուդոյի, սիրում է ֆուտբոլ  խաղալ։ Ստեփանակերտից տեղափոխվելուց հետո այժմ հաճախում է անգլերենի և կարատեի խմբակների։
Սևակ Գալստյանը սովորում  է Շիրակացու ճեմարանում, շատ հետաքրքրասեր է, սիրում է մաթեմատիկան,  ունի վերլուծական մտածողություն։ Բիզնեսի հետ կապված՝ ամեն ինչ իրեն հետաքրքիր է։ Ստեփանակերտում հաճախում էր նաև կարատեի։  
Տարոն Ասրյանը աշխույժ, ակտիվ երեխա է: Սիրում է շախմատ խաղալ, նկարել, քանդակել,  փորագրել փայտի վրա։ Նա ընկերասեր է և  շփվող։

Դասընթացների մասին.
Թիրախային լսարան՝ 10-ից 15 տարեկան 21 երեխա: Ծրագրի տևողությունը՝ 2 շաբաթ / 6 դաս:
Դասերը կանցկացվեն Էդգար Կարապետյանի ղեկավարությամբ, ով Գալաքսի Գրուպի ռազմավարության և նորարարության գծով տնօրենն է: Էդգարը նաև բիզնես խորհրդատու է և փորձագետ բիզնես ռազմավարության և թվայնացման ոլորտում, Ռուս-Հայկական (Սլավոնական) համալսարանի դասախոս  և Ստենֆորդի համալսարանի առաջատար ծրագրի շրջանավարտ:

Ի՞նչ կստանա երեխան դասընթացն ավարտելուց հետո՝ 

• հասկանալ թվային փոխակերպման ազդեցությունը բիզնեսի վրա,
• նորարարությունների բացահայտում հաջողակ միջազգային ընկերություններում,
• թվային բիզնես մոդելների ուսումնասիրություն,
• հասկանալ սպառողների վարքագծի փոփոխությունները,
• բիզնես գործերի վերլուծություն՝ օգտագործելով այնպիսի ընկերությունների օրինակ, ինչպիսիք են՝ Amazon-ը, Spotify-ը,
  Netflix-ը, Tesla-ն և Starbucks-ը:

Յուրաքանչյուր երեխայի մասնակցության համար պահանջվում է 45600 ՀՀ դրամ: 

Մենք գիտակցաբար մոտենում ենք երեխաներին օգնելու ոլորտների ընտրությանը: Մենք կարող ենք ոչ միայն արժեքավոր հմտություններ հաղորդել երեխաներին, այլև օգնել նրանց հասկանալ, թե ինչպես օգտագործել այդ հմտությունները: Այս ամենը հնարավոր կլինի ձեզանից յուրաքանչյուրի հոգածության շնորհիվ։ Միասին կօգնենք արցախցի երեխաներին շարժվել դեպի կայուն և հաջողակ ապագա: