Պատմություն

Երեխայի զարգացման կարևոր ասպեկտներից մեկը կրթությունն է, որն օգնում է ընդլայնել նրանց աշխարհայացքը և բացահայտել ինչ-որ նոր բան ոչ միայն իրենց շուրջը, այլ նաև  իրենց ներսում: Ուրախ ենք տեղեկացնել, որ   10-ից 15 տարեկան արցախցի երեխաների բիզնես- դասերի կազմակերպմանն ուղղված՝  մեկնարկում է դրամահավաք:

Ցանկանում ենք ձեզ ներկայացնել ստեփանակերտցի մեր շահառուներին.

Արեն Հովհաննիսյան, 14 տարեկան, հեշտ է հաղորդակցվում մարդկանց հետ, ընկերասեր է, ճկուն,  արագ  կողմնորոշվող, ունի շատ նախասիրություններ։ Հաճախել է «Թումո» կենտրոն։ Արցախում զբաղվել է նաև սպորտով։
Վաղինակ Սարգսյան, 13 տարեկան, ակտիվ  և խելացի երեխա է,  շատ է սիրում մաթեմատիկա և հայոց պատմություն առարկաները,  ինչպես նաև սիրում է ազատ ժամանակ ֆուտբոլ խաղալ։ Երազում է դառնալ ատամնաբույժ։
Սյուզաննա Հայրապետյան, 12 տարեկան, սովորում է 7-րդ դասարանում։ Արցախում զբաղվել է սպորտով,  ինչպես նաև հաճախել է  պարի, կարուձևի, հելյունագործության խմբակների։ Նախասիրություններից է նկարչությունն ու կավագործությունը, սիրում է նաև հրուշակագործությունը, ինտերիերը։ Երևանում այժմ հաճախում է նկարչության և կավագործության պարապմունքների։ 
Անիտա Աթայան, 12 տարեկան, խելացի է, պարտաճանաչ ու աշխատասեր։ Արցախում սովորել է  կոլաժի և պարի ավարտական դասարաններում։ Նվագում է ջութակ։  Իր նոր հետաքրքրություններից է բիզնեսը։  
Մարգարիտա Տերտերյան, 12 տարեկան, հաճախում է  Մինաս Ավետիսյանի անվան նկարչական դպրոց, ստեղծում է կերպարներ և կարճամետրաժ անիմացիաներ:

Դասընթացների մասին.
Թիրախային լսարան՝ 10-ից 15 տարեկան 21 երեխա: Ծրագրի տևողությունը՝ 2 շաբաթ / 6 դաս:
Դասերը կանցկացվեն Էդգար Կարապետյանի ղեկավարությամբ, ով Գալաքսի Գրուպի ռազմավարության և նորարարության գծով տնօրենն է: Էդգարը նաև բիզնես խորհրդատու է և փորձագետ բիզնես ռազմավարության և թվայնացման ոլորտում, Ռուս-Հայկական (Սլավոնական) համալսարանի դասախոս  և Ստենֆորդի համալսարանի առաջատար ծրագրի շրջանավարտ:

Ի՞նչ կստանա երեխան դասընթացն ավարտելուց հետո՝ 

• հասկանալ թվային փոխակերպման ազդեցությունը բիզնեսի վրա,
• նորարարությունների բացահայտում հաջողակ միջազգային ընկերություններում,
• թվային բիզնես մոդելների ուսումնասիրություն,
• հասկանալ սպառողների վարքագծի փոփոխությունները,
• բիզնես գործերի վերլուծություն՝ օգտագործելով այնպիսի ընկերությունների օրինակ, ինչպիսիք են՝ Amazon-ը, Spotify-ը,
  Netflix-ը, Tesla-ն և Starbucks-ը:

Յուրաքանչյուր երեխայի մասնակցության համար պահանջվում է 45600 ՀՀ դրամ:

Մենք գիտակցաբար մոտենում ենք երեխաներին օգնելու ոլորտների ընտրությանը: Մենք կարող ենք ոչ միայն արժեքավոր հմտություններ հաղորդել երեխաներին, այլև օգնել նրանց հասկանալ, թե ինչպես օգտագործել այդ հմտությունները: Այս ամենը հնարավոր կլինի ձեզանից յուրաքանչյուրի հոգածության շնորհիվ։ Միասին կօգնենք արցախցի երեխաներին շարժվել դեպի կայուն և հաջողակ ապագա: