Սարգիսի ճանապարհը դեպի խոսք, ժպիտ և մեծ երազանքներ

Ձեր անհավատալի աջակցության շնորհիվ 7-ամյա Սարգիս Արշակյանը մեծ քայլ է կատարել դեպի պայծառ ապագա: Սարգիսը ծնվել է լսողության և խոսքի խանգարումներով և հաղորդակցվելու համար օգտվում է լսողական սարքերից։ Սակայն նրա խոսքը լիարժեք զարգացնելու համար բժիշկները նշանակել էին օրթոդոնտիկ սարք ու բրեկետներ՝ ծնոտի հետ կապված խնդիրը շտկելու նպատակով, որը խանգարում էր ճիշտ արտասանությանը։

Ձեր նվիրատվությունների շնորհիվ Սարգիսը ստացավ անհրաժեշտ բուժումը, և արդյունքներն արդեն տեսանելի են։ Նա հիմա շատ ավելի հստակ է արտաբերում հնչյունները, և շարունակական աջակցության շնորհիվ նա վստահ առաջ է շարժվում՝ դեպի ազատ ու ինքնավստահ հաղորդակցում։ Ատամնաբույժի վերջին այցելության ընթացքում պարզվեց, որ Սարգիսի ավելի քան հինգ ատամները վատ վիճակում են։ Դրանց բուժումն առաջին հավաքագրած գումարի սահմաններում չէր, բայց Կոտայքի մարզի Զովունի գյուղի բարի և հոգատար ատամնաբույժը՝ բժշկուհի Ալլան, նախաձեռնեց և անվճար իրականացրեց անհրաժեշտ բուժական միջամտությունները։ Նրա աջակցությունը թույլ տվեց, որ Սարգիսն իր ապաքինումը շարունակի՝ առողջ և ցավից զերծ ժպիտով։ Սարգիսը շարունակում է զարմացնել բոլորին իր էլեկտրոնիկայի հանդեպ սիրով։ Նա սիրում է փոքր մեքենաներ պատրաստել, աշխատել շարժիչների ու այլ էլեկտրական բաղադրիչների հետ։ Նրա հետաքրքրասիրությունն ու ստեղծարարությունը փայլում են նույնքան պայծառ, որքան նրա նոր ժպիտը։

IMAST app-ի հետ իրականացված դրամահավաքի ընթացքում հավաքվել է 649․723 դրամ, որն արդեն փոխանցվել է երեխայի բուժման նպատակով։ Սրտանց շնորհակալություն ենք հայտնում բոլոր այն մարդկանց, ովքեր աջակցեցին Սարգիսի բուժմանը։ Մեր հատուկ շնորհակալությունն ենք հայտնում մեր սիրելի գործընկերոջը՝ IMAST հավելվածին, որի աջակցությունը կարևոր դեր խաղաց այս ծրագրի հաջողության մեջ։ Միասին մենք Սարգիսին պարգևեցինք ավելին, քան պարզապես բուժօգնությունն է․ մենք նրան տվեցինք վստահություն՝ ժպտալու, խոսելու և մեծ երազելու։